Racing Team – ەنەرگيا ۇنەمدەيتىن تەحنولوگيالاردى ازىرلەيتىن العاشقى كوماندا. جوبا جەتەكشىسى, كوماندا كاپيتانى جانە نەگىزىن قالاۋشى الىبەك ءيبرايمنىڭ ايتۋىنشا, بيىل Shell Eco-marathon قاتىسۋ شارتتارى مەن ستاندارتتارى قيىنداعانىنا قاراماستان, ساتباەۆ ۋنيۆەرسيتەتىنىڭ كومانداسى تەحنيكالىق بايقاۋدان سۇرىنبەي ءوتىپ, جارىس الاڭىن ءۇش رەت اينالىپ, ۇزدىك ناتيجە كورسەتتى.
بيىل 16 ەلدەن 50-دەن استام كوماندا قاتىسقان ەنەرگيا ۇنەمدى كولىكتەر شەرۋى الەمگە ايگىلى «فورمۋلا-1» حالىقارالىق Lusail Race Track جارىس جولىندا وتكەن.
كوماندا ەلەكتروموتور قۇراستىرۋدا نەگىزگى بولشەكتەردى جاساۋ ءۇشىن قايتا وڭدەلگەن پلاستيك جانە 3D پرينتەرمەن قوسا, يننوۆاتسيالىق تەحنولوگيالاردى پايدالانعان. بۇل جوباعا ءار فاكۋلتەتتەن ستۋدەنتتەر قاتىسىپ, بىلگەن بىلىمدەرىن ورتاعا سالۋىنىڭ ناتيجەسىندە ەرەكشە جارىس كولىگىن قۇراستىردى. جوباعا Shell Kazakhstan كومپانياسى باس دەمەۋشىلىك ەتسە, جاڭا كولىكتى ازىرلەۋگە Tesla Kazakhstan كومپانياسى قولداۋ كورسەتىپ وتىر.
وسىلايشا Racing Team كومانداسى ازىرلەگەن TOQ prototype 4.0 جارىس ماشيناسى 1 كۆت ەنەرگيامەن 205 شاقىرىمدى ەڭسەرىپ, جوعارى كورسەتكىشتى باعىندىردى. كوماندانىڭ ەندىگى باعىتى قىتايدا وتەتىن جارىسقا قاتىسۋ. ول ءۇشىن ۇلكەن دايىندىق پەن دەمەۋشىلەردىڭ قولداۋى قاجەت.
بىلتىر يندونەزيادا وتكەن جارىستا Racing Team كومانداسى «قاۋىپسىزدىك سىيلىعىنا» يە بولىپ, 3 مىڭ دوللار يەلەنىپ قايتقان بولاتىن.
